[ඩිල්ෂාන් මඩවල]
සෙවණගල රෝහලේ ස්ථානභාර වෛද්‍යවරයාගේ නිල නිවසේ ජල ටැංකියට වස මිශ‍්‍ර කළ බව කියන සිද්ධිය සම්බන්ධයෙන් වැදගත් කරුණු කිහිපයක් හෙළි වී තිබෙනවා. පොලීසිය පවසන්නේ එම ජල ටැංකියෙන් සහ සෙවණගල රෝහලේ ප‍්‍රධාන ජල ටැංකියෙන්ද ජල සාම්පල ලබාගෙන රජයේ රස පරීක්ෂකවරයාට යොමු කළ බවයි. රෝහලේ ප‍්‍රධාන ජල ටැංකියේ වස මිශ‍්‍ර වී නොතිබූ බවත්, ස්ථානභාර වෛද්‍යවරයාගේ නිල නිවසේ ජල ටැංකියට පමණක් වස මිශ‍්‍ර වී තිබූ බවත් එම ජල සාම්පල පරීක්ෂා කිරීමේදී හෙළිව තිබෙනවා. රස පරීක්ෂණ වාර්තාවේ  වැඩිදුරටත් සඳහන් වන්නේ මිශ‍්‍ර වී තිබූ වස වර්ගය කෘෂි රසායනිකවල අඩංගු එම්.සී.පී.ඒ. සංඝටක බවයි. විමර්ශන තවදුරටත් සිදු කෙරෙනවා.